Timu ya mpira wamiyendo yadziko lino ya Flames yakwera ndi ma sitepe atatu pa ndandanda wa momwe matimu ayimira padziko lonse kuchoka pa nambala 134 kufika pa 131.
Izitu ndi malingana ndi uthenga omwe bungwe lomwe limayendetsa masewero padziko lonse la FIFA latulutsa lero pa 28 November 2024.
Kukwera kwa timuyi kwadzaso pomwe mumasewero ake awiri omwe yasewera mwezi uno pansi pa mphunzitsi wake ogwirizira Kalisto Pasuwa inakwanitsa kufananitsa mphamvu ndi Burundi 0-0 komanso kugonjetsa timu ya Burkina Faso 3-0 mu mpikisano wa Africa Cup of Nations qualifiers. Kuno ku Africa, Flames yakwera ndi sitepe imodzi kuchoka pa nambala 39 kufika pa 38.
Padziko lonse Argentina ndi yomwe yakakamira ngalawa ya pa nambala 1 ndipo France ndi imene ikubwera pa nambala yachiwiri. Kuno ku Africa ikutsogola ndi timu ya Morocco yomwe padziko lonse ili pa nambala 14 pamene Senegal ikutsatana nayo pomwe padziko lonse yaima pa nambala 17.
Wolemba : Eliot Tandani
