Olemba Burnett Munthali
Otsatira chipani cha Malawi Congress Party (MCP) ochokera m’dera lapakati m’boma la Mzimba apitiriza kugona pa m’bindikiro ku likulu la chipanichi ku Lilongwe.
Akunena kuti apanga chisankhochi chifukwa chotsutsa momwe chipanichi chikuyendetsera ndondomeko ya chisankho chachipulula cha phungu m’dziko lonselo makamaka m’dziko lawo.
Akutsutsa kwambiri njira zomwe akuluakulu a chipani adatsatira posankha omwe akuyimira chipanichi pa mpando wa phungu m’dziko lawo.
A Paul Chondo, omwe ndi khansala wa dera la Euthini m’boma la Mzimba, wati sadzachoka pa m’bindikirowu mpaka atsogoleri a chipani atayankha nkhani zawo zonse.
Iwo akunena kuti akuluakulu a MCP ku likulu anachita kusintha mayina a anthu ovotera popanda kufotokozera chinthu chilichonse.
Amati zomwezi zidachitika mwadala pofuna kukondera ena mwa omwe akupikisana nawo pa mpando wa phungu komanso wa khansala.
A Paul Chondo anawonjezera kuti izi zikuwononga demokalase ndipo sizikuyenera kulolezedwa ngati chipani chikulakalaka kukhala chachilungamo komanso choona mtima.
A Alimon Mziya, omwe ndi m’modzi mwa omwe amawona ntchito zokopa anthu ku dera la Mzimba, adati kuyambira dzulo akuluakulu a chipanichi sanapereke mayankho aliwonse.
Anati chipani chinapatsidwa mayina a nthumwi zaku ma Area mwezi wa February chaka chino koma modabwitsa mayinawo adasinthidwa osafotokoza chifukwa chake.
A Mziya anafotokoza kuti zimenezi zakhumudwitsa anthu ambiri ku Mzimba omwe anali ndi chiyembekezo kuti chisankhochi chidzayenda molungama.
Iwo adatinso anthu akuwona ngati chipani cha MCP chayamba kutsatira njira zakukondera anthu ena zomwe zingawononge mbiri ya chipanichi.
Otsatira a chipanichi apempha atsogoleri a MCP kuti abwerere ku njira zolungama za demokalase kuti anthu azikhulupirira chipani chawo.
Iwo adalimbikitsa atsogoleri kuti akumane ndi anthu okhudzidwa ndi nkhaniyi kuti apeze yankho logwirizana ndi chilungamo.
Mpaka pano, m’bindikiro wa otsatira a MCP ku Lilongwe ukupitilira ndipo akuwonetsa kuti sadzalola kuti mawu awo apondeledwe.
