By Suleman Chitera
Anthu ambiri ku Malawi akupitiriza kufuna kuti kafukufuku wokhudza ngozi ya ndege yomwe inapha Vice President Saulos Klaus Chilima uchitike momveka bwino komanso poyera, kuphatikizapo kufalitsidwa live pa wayilesi kuti nzika zonse zizitha kutsatira zomwe zikuchitika.
Malinga ndi malingaliro a anthu ambiri, kufalitsa kafukufukuyu pa radio kungathandize kubwezeretsa chidaliro cha anthu pa boma komanso kuonetsetsa kuti palibe chobisika pa zomwe zikufufuzidwa.
Amalawi ambiri akufuna kumva mwachindunji zomwe Pulezidenti Lazarus Chakwera anganene akafunsidwa pa nkhani zina zomwe ananena kale zokhudza ngoziyi. Anthu akufuna kudziwa kuti zimene ankalankhula zija anazipeza kuti, komanso ngati pali anthu ena amene anamupatsa chidziwitsocho.
Kuphatikiza apo, anthu akufunanso kumva zomwe Valentintiin Phiri ananena kale, kuti afotokozere momveka bwino komwe anapeza zomwe ankalankhula zokhudza ngoziyi.
Pali nkhawa zambiri pakati pa nzika zokhudza mmene nkhaniyi yayendetsedwera mpaka pano. Ena akuti pali mafunso ambiri osayankhidwa, kuphatikizapo momwe ngoziyi inachitikira, ngati panali zolakwika zilizonse, komanso ngati pali anthu amene angayimbidwe mlandu.
Akatswiri a za ndale ndi malamulo akunena kuti kufalitsa kafukufuku live kungakhale njira imodzi yolimbikitsira kuwonekera poyera (transparency) komanso kulimbikitsa udindo (accountability) kwa atsogoleri.
Pomaliza, anthu ambiri akugwirizana kuti nkhani ya imfa ya a Chilima ndi yofunika kwambiri m’dziko muno, choncho akuyembekezera kuti boma lidzapereka mayankho omveka bwino, osabisa chilichonse, kuti chilungamo chionekere ndipo chidaliro cha anthu chibwezeretsedwe.
