Malawi Freedom Network 
Wolemba: MFN News Desk Team | 02 October 2026
LILONGWE — Mtsogoleri wa ndale komanso wotsatira nkhani za DPP, Imran Jumbe, wanena kuti vuto lalikulu lomwe likukumana ndi Democratic Progressive Party (DPP) mwina silili adani ake andale, koma ndi kuiwala ma foot soldiers — asilikali apansi — omwe anathandiza kuti chipanichi chibwerere ku ulamuliro.
Jumbe akuti anthu ambiri omwe adagwira ntchito molimbika pothandiza DPP kulimbikitsa anthu, kufalitsa mauthenga, kulemba, komanso kuteteza chipanichi pa nthawi ya nkhondo yake yolimbana ndi Malawi Congress Party (MCP), masiku ano akuoneka ngati sakufunikanso kapena alibe phindu.
Iye akuti chodetsa nkhawa kwambiri n’chakuti anthu ena omwe sanachitepo kanthu pothandiza DPP kuti ipambane akhala akupeza njira zolowera m’boma, pomwe ena mwa anthu omwe ananyamula chipanichi pa nthawi yovuta akuoneka kuti akuiwalika.
Malinga ndi Jumbe, anthu ena omwe ali m’boma akhoza kukhala ngati chiswe chomwe chikudya nyumba ya DPP kuchokera mkati, ngati mavuto omwe akukumana ndi anthu sakuthandizidwa mwachangu.
Zizindikiro zikuwoneka
Jumbe watchula mavuto osiyanasiyana omwe, malinga ndi iye, akuyenera kuchititsa DPP kukhala tcheru.
Madzi akupitiriza kukhala vuto m’madera ena chifukwa cha mavuto a mapaipi ndi kayendetsedwe ka ntchito za Water Board.
Mavuto a magetsi nawonso akupitirirabe, pomwe anthu ndi mabizinesi akukumana ndi zovuta chifukwa cha kusadalirika kwa magetsi.
Jumbe wanenanso za kukwera kwa misonkho, zomwe akuti zikulemera kwambiri kwa anthu wamba komanso mabizinesi.
Ku Migration Department, mavuto okhudzana ndi kupeza mapasipoti akupitiriza kudetsa nkhawa anthu ambiri.
Alimi nawonso akukumana ndi mavuto, kuphatikizapo kukwera kwa mitengo ya zipangizo zaulimi, zomwe zikupangitsa kuti ulimi ukhale wovuta kwa mabanja ambiri.
Pa nkhani ya mafuta, Jumbe watchulanso za kusowa kwa petrol ndi diesel, ponena kuti mavutowa akakhazikika kwa nthawi yayitali amakhudza kwambiri kayendedwe ka zinthu ndi chuma cha dziko.
“DPP, mukudziwombera nokha kumapazi”
Jumbe wapereka chenjezo lolunjika kwa atsogoleri a DPP kuti asadzilowetse okha m’mavuto chifukwa cha kusamvera kapena kunyalanyaza anthu omwe anathandiza chipanichi.
“DPP, you are shooting yourselves in the foot. Mukupereka nokha zida kwa adani.”
Iye akuti pali anthu ena omwe ali m’boma omwe, malinga ndi zomwe akuwona, akhoza kukhala akusokoneza ndondomeko ndi zolinga za boma, zomwe zingapangitse anthu kuona ngati DPP ikulephera kukwaniritsa zomwe idalonjeza.
Jumbe akuchenjeza kuti DPP iyenera kukhala tcheru chifukwa, ngati mavutowa saperekedwa yankho, chipanichi chingayambe kuoneka ngati chombo cha Titanic chomwe chikuyamba kumira.
“DPP iyenera kukhala tcheru kwambiri, chifukwa pang’onopang’ono ikhoza kuyamba kukhala ngati chombo cha Titanic chomwe chikumira. Ndipo pamapeto pake, muyenera kudzadzudzula nokha.”
“Mwatseka zitseko kwa ma foot soldiers”
Jumbe akuti chimodzi mwa zinthu zomwe zikudetsa nkhawa kwambiri ndi mmene ma foot soldiers a DPP akuchitiridwa.
Iye akuti anthu amenewa adagwira ntchito usana ndi usiku, kulimbikitsa chipanichi, kufalitsa uthenga wake komanso kulimbana ndi MCP pa nthawi yomwe DPP inkafunika thandizo kwambiri.
“Ma foot soldiers ankagwira ntchito usana ndi usiku, kulimbana ndi MCP ndi kuyika mitu yawo pa njanje kuti mpakana inu mutenge boma. Koma lero, olo ndi ma telefoni omwe munasiya kuyankha.”
Jumbe akuti ena mwa anthu omwe anathandiza kwambiri kuti chipanichi chibwerere ku ulamuliro tsopano akuona ngati zitseko zatsekedwa kwa iwo, pomwe anthu ena omwe sanadziwike pa nthawi ya nkhondo ya ndale akupeza mwayi wambiri.
Akupitiriza kudzudzula zomwe akuwona ngati kusiyana pakati pa anthu omwe anathandiza chipanichi pa nthawi yovuta ndi omwe akupindula nacho panopa.
“You are busy making yourselves billionaires. Mwayiwala anthu omwe ananyamula katundu wanu pamene munalibe mphamvu yonyamula nokha.”
“Musanyoze anthu omwe mukuwawona ngati osafunika”
Jumbe akupempha atsogoleri a DPP kuti asanyoze kapena kunyalanyaza anthu omwe lero akuoneka ngati alibe mphamvu, maphunziro kapena udindo waukulu m’chipanichi.
Iye akuti ndale sizikhala chimodzimodzi nthawi zonse ndipo munthu amene akuoneka ngati wosafunika lero akhoza kukhala munthu amene chipanicho chidzafune kwambiri mawa.
“Palibe amene akudziwa zomwe mawa lingabweretse. Anthu omwe mukuwawona ngati osafunika lero, omwe mukuti ndi osaphunzira, akhoza kukhala anthu omwe mudzawafune kwambiri mawa.”
Pomaliza, Jumbe wagwiritsa ntchito fanizo la Titanic popereka chenjezo kwa utsogoleri wa DPP.
“Chombo chikayamba kulowa madzi, si nthawi yoti oyendetsa ake azikangana kuti ndani anayambitsa bowo. Ndi nthawi yoti aliyense agwire ntchito yoletsa chombocho kumira.”
Kwa Jumbe, uthenga wake ndi umodzi: DPP iyenera kumvetsera anthu ake, makamaka ma foot soldiers omwe ananyamula chipanichi pa nthawi yomwe chinkafunika kwambiri thandizo.
“My pen is mightier than a sword.”
— Imran Jumbe
